2 APRIL
November 1, 2016
4 APRIL
November 1, 2016

Gebeure

1702 – Merestijn strand

’n Skip, die Meresteijn, strand aan die Kaapse weskus. ’n Deel van die vrag silwer en goud wat aan boord was, is gedurende 1972 herwin.

1860 – Pretoria word hoofstad van die ZAR

1866 – Die Vrede van Thaba Bosigo word onderteken

1900 – Anglo-Boereoorlog: Krygsgevangenes seil na St. Helena

Genl. PA Cronjé en sy vrou, saam met kolonel Adolf Schiel en ongeveer 1 000 Republikeinse krygsgevangenes, seil van Kaapstad na St. Helena.

1900 – Anglo-Boereoorlog: Geveg by Mostertshoek

Dag 1: Kaptein McWhinnie het die vorige dag Dewetsdorp verlaat en is op pad na Reddersburg se kant toe.

Presies wat die rede is, is nie duidelik nie, maar kaptein McWhinnie kom eers lank na sonop in beweging. Rondom 10:00 besluit De Villiers die tyd vir aksie het aangebreek. McWhinnie neem stelling in op ’n nabygeleë randjie en grawe homself in. Die man het egter uit die staanspoor probleme. Eerstens sukkel hy om die Boere te sien, en tweedens is die afstand waaroor geskiet word ver. Die Boere daarenteen het geen probleem met die afstand nie en skiet dat die aarde dreun.

Generaal Catarce verskyn intussen ook op die toneel met versterkings. Lord Roberts laat weet hom egter dat as hy nie seker is van sy saak nie, hy nie moet aanval of help nie. Intussen het die son begin sak en trek McWhinnie se mense swaar omdat daar min water en kos is. Die Boere daarenteen slag skaap en braai vleis asof dit Nagmaal is en nie die middel van ’n geveg nie.

Geboortes

1866 – James Barry Munnik Hertzog, Suid-Afrikaanse politikus en staatsman, Eerste Minister van Suid-Afrika († 21 November 1942)

James Barry Munnik Hertzog was ’n Suid-Afrikaanse staatsman en generaal. Hy is die Suid-Afrikaanse regeringshoof wat die langste gedien het, van 1924 tot 1939. Hertzog het ’n belangrike rol in die politieke ontwikkeling van die Afrikaner gespeel en het hom beywer vir die opbou van die Afrikaner na oorlog en armoede. Sy slagspreuk was “Suid Afrika Eerste” en hy was die grootste inspirasie vir die Voortrekkerbeweging.

Sterftes

2010 – Eugène Terre’Blanche, politieke aktivis, leier van die AWB (* 31 Januarie 1941)

Eugene Ney Terre’Blanche is op 31 Januarie 194 in Ventersdorp gebore uit ywerige Afrikanernasionalistiese ouers. Na matrikulasie het hy by die Suid-Afrikaanse Polisiediens aangesluit en vyf jaar gedien voordat hy boer geword het. Op 3 Julie 1973, saam met ses ander, stig hy die Afrikaner Weerstandsbeweging (AWB) in ’n motorhuis in Heidelberg, in die destydse Transvaal (nou Gauteng). Die bedoeling van die AWB was om ’n vaderland vir die Boerevolk te vestig. Die AWB het vyf jaar lank as ’n semi-geheime organisasie gefunksioneer voordat dit openbaar geword het. Terre’Blanche beskou die einde van apartheid in 1990 as die begin van kommunisme en dreig die destydse president FW de Klerk met ’n burgeroorlog. Na die einde van apartheid het Terre’Blanche en sy ondersteuners amnestie by die Waarheids-en-versoeningskommissie (WVK) gesoek vir die stormloop van die Wêreldhandelsentrum (waar onderhandelinge tussen verskillende politieke partye vir ’n nuwe demokratiese grondwet plaasgevind het), die “Slag van Ventersdorp” en ander handelinge. Die WVK het hom amnestie hiervoor verleen. In 2008 het hy die AWB herroep en ’n “vrye Afrikaner-republiek” gevra. Op 3 April 2010 is hy deur een van sy werkers op sy plaas vermoor.

Bronne:

Federasie van Afrikaanse Kultuurvereniginge. 1980. Afrikaanse Kultuuralmanak. Johannesburg: FAK.

Vriende van Afrikaans. Dae uit ons geskiedenis. ’n Afrikaanse kultuur-historiese dagboek. Kaapstad: Griffel.

https://www.sahistory.org.za

https://af.wikipedia.org/wiki/